जापानको जेलमा १५ जना नेपाली कैदिबन्दी

अनिल कुमार शाही २०८० वैशाख १३ गते बुधबार, प्रकाशित

मानव अधिकार आयोगले सार्वजनिक गरेको एउटा प्रतिवेदन अनुसार एक हजार ३० जना नेपालीहरु विदेशी जेलमा थुनिएर बसेका छन् । सार्वजनिक गरिएको प्रतिवेदनमा उल्लेख गरिएको तथ्यांक अनुसार जापानमा मात्रै १५ जना नेपालीहरु जेलमा थुनिएका छन् ।

प्रतिवेदनमा उनीहरु के कस्ता कसुर वा अपराधमा जेल परेको भन्ने चाँहि खुलाइएको छैन । पछिल्लो समय जापानमा नेपालीहरुको मृत्युका घटनाहरु धेरै नै बाहिरिन थालेका छन् । रोग वा आकस्मिक कारणले भन्दा पनि मृत्युको मुख्य कारण आत्महत्या देखा परेको छ ।

सबैभन्दा धेरै नेपालीले कारावास भोगिरहेको देश भने संयुक्त अरब इमिरेट्स (यूएई) हो । त्यहाँ २६० जना नेपाली जेल जीवन बिताइरहेका छन् । त्यसपछी दोस्रो धेरै मलेशियामा २२३ जना नेपालीहरु जेलमा छन् । कुवेतको जेलमा १६८ जना, साउदी अरबमा १५३ जना र हङकङमा ८८ जना नेपाली जेलमा भएको प्रतिवेदनले देखाएको छ ।

हालैका वर्षमा विदेशिने नेपालीहरुको संख्या बर्षेनी बढ्दो छ । जागिर, अध्ययन, व्यवसाय लगायत बिभिन्न कारणले गर्दा बर्षेनी ठूलो संख्यामा नेपाली विदेश गइरहेका छन् । नेपालीहरु विदेशिने क्रम बढेसँगै रेमिट्यान्सको रुपमा देशभित्र अर्बौ रुपया आइरहेको छ ।

यसैले अर्थतन्त्रलाई चलायमान पनि बनाइरहेको छ । तर विदेशिनको संख्या बढेसँगै विदेशी जेलमा थुनिएर बसेका नेपालीहरुको संख्या पनि बढ्दो छ । विदेशमा जीवन गुमाएर काठको बाकसमा फर्किने वा विदेशमै अन्तिम संस्कार भएका नेपालीहरुको संख्या पनि बढेको छ ।