तमोर नदी थुनिँदा मितलुङ बजार जोखीममा

२०७३ असार २६ गते आइतबार, प्रकाशित

शनीबार राति ताप्लेजुङ्गमा गएको पहिरोले थुनिएको तमोर नदीले धार परिवर्तन गरेर बग्न थालेपछी नदी किनारका तीन ओटा बजार जोखीममा परेका छन् । ताप्लेजुङको सावादिन गाविसमा गएको पहिरोले थुनिएको नदीले आफ्नो धार परिवर्तन गरेर बग्न थालेको छ ।

थुनिएको तमोर नदी फरक धारबाट बग्न थालेपछी नदी किनारका दोभान, हान्द्रुङ र मितलुङ बजार जोखीममा परेका हुन । नदी थुनिएर फुरुम्बु गाविसको मितलुङ बजार नजिकै भएर बग्न थालेको छ । थुनिएको भाग पुरै खुलिनसकेको हुँदा बजारहरु जोखीममै रहेको स्थानीयले बताएका छन् ।

पहीरोले जिवन लाबुङ र दिलबहादुर लाबुङको घर डुवानमा परेको छ भने जिवन लाबुङको एक हल गोरु बगाएकोे छ । अन्य क्षति के कति भएको छ भन्ने बारेमा पुरै विवरण आउन बाँकी रहेको सिवा प्रहरी चौकीले बताएको छ । पहीरोको जोखीममा रहेको मितलुङमा २१ घर रहेका छन् भने हान्द्रुङमा ३० भन्दा बढी र दोभानमा ७० भन्दा बढी घरहरु छन् ।

सावादिन गाविसको नाक्ला भिरबाट राति करीव दुई बजेतिर पहिरो तमोर नदीमा झरेको थियो । केहि समय थुनिएको नदीले आफ्नो धार परिवर्तन गरी बग्न सुरु गरेको छ । थुनिएको भाग पूर्ण रुपमा नखुलेकाले मितलुङ बजार सहित, नदी किनारमा रहेका दोभान र हान्द्रुङ बजार जोखिममा रहेको प्रहरीले बताएको छ ।

ठुलो पहिरो नझरेपनि हल्का पहिरो झर्ने क्रम नरोकीएको स्थानीयले बताएका छन् । पहिरोले मितलुङ बजार भन्दा मुनि नदीको भाग पुरै थुनेर पानी बस्तीमा पस्न थालेको छ । नदी थुनिएर बनेको पोखरीको भागबाट पानी निकास हुन थालेकाले सम्भावित जोखीम भने केही न्युन भएको छ ।

दोभान र हान्दु्रङका स्थानीयलाई प्रहरीले सचेत भएर बस्न आग्रह गरेको छ । नदी थुनिएको भाग मितलुुङ बजारका स्थानीय बासीन्दा बजार छाडेर माथिल्लो भागमा सुरक्षित स्थानतर्फ सरेका छन् । पहीरो गएको ठाउँमा सिवा प्रहरी चौकीको टोली पुगेको छ ।