गुण्डाले प्रहरीलाई ७० लाख बुझाएको खुलासा

२०७३ असोज ४ गते मंगलबार, प्रकाशित

गुन्डा र प्रहरी बीचको कनेक्सन कति बलियो हुँदो रहेछ भन्ने कुरा हालैको एउटा घटनाले सार्बजनिक गरिदिएको छ । गुन्डागर्दीकै भरमा ठेक्कापट्टा गर्दै आएका एक गुन्डाले एउटै ठेक्काबाट प्रहरीलाई ७० लाख रुपैयाँ बुझाएको रहस्य खुल्न आएको छ ।

गुण्डा नाईके दीपक मनाङेका दाहिने हातका रुपमा चिनिने उमेश लामा यतिबेला महानगरीय प्रहरी परिसर काठमाडौंको खोरमा छन् । उनीमाथि अनुसन्धान गर्ने क्रममा प्रहरी भवन निर्माणको ठेक्का मिलाएपछि उनले प्रहरीलाई मात्र ७० लाख रुपैयाँ बाँडेको खुलेको हो ।

लामाले ८ वटा प्रहरी कार्यालयको भवन निर्माणको ठेक्का पाएका छन् । जसमध्ये एक चितवनस्थित जुनियर प्रहरी एकेडेमी पनि हो । जुन सात करोड रुपैयाँको ठेक्का हो । मिलेमतोका आधारमा अधिकतम दररेटमा उनले ठेक्का पारेका थिए ।