राष्ट्रपतिको भ्रमणमा ४ सय भारतीय कमाण्डो आउँदै

२०७३ कार्तिक ५ गते शुक्रबार, प्रकाशित

भारतीय राष्ट्रपति प्रणव मुखर्जीको आसन्न नेपाल भ्रमणको तयारीबारे बिहीबार नेपाल र भारतका अधिकारीबीच छलफल भएको छ । भ्रमणको तयारीलाई दुवै देशका तर्फबाट अन्तिम रूप दिनका लागि नेपाल आएको भारतीय टोली र परराष्ट्र मन्त्रालयका अधिकारीबीच छलफल भएको हो ।

शिष्टाचार महापालको नेतृत्वमा आएको भारतीय टोलीले नेपालका समकक्षीको टोलीसँग भ्रमण तयारीबारे जानकारी लिएका थिए । ‘कुनै पनि देशको विशिष्ट व्यक्तिको भ्रमण अघि गरिने यो सामान्य औपचारिक प्रक्रिया हो’, परराष्ट्रका एक अधिकारीले भने, ‘उहाँहरूलाई हामीले भ्रमणबारे भइरहेको तयारीको जानकारी गरायौँ । ‘

ती अधिकारीका अनुसार भारतीय टोलीले राष्ट्रपतिले भ्रमण गर्ने भनिएको पोखरा, जनकपुर लगायत स्थानको अवलोकन भ्रमण गर्नेछन् । परराष्ट्र मन्त्रालय निकट स्रोतका अनुसार भारतीय पक्षबाट राष्ट्रपतिको भ्रमणका लागि करिब चार सयको संख्यामा भारतीय कमान्डो टोली पनि आउने छन् ।

‘सुरक्षा खतरा वा त्यस्तो कुनै विशेष परिस्थिति भनेर होइन कि प्रोटोकलको कारणले हो’ परराष्ट्रका ती अधिकारीले भने–‘एक वर्षअघि भारतीय प्रधानमन्त्री नरेन्द्र मोदीको भ्रमणको बेला पनि करिब दुई सयको संख्यामा कमान्डो टोली खटिएको थियो ।’