रुपन्देही बन्द फिर्ता, आन्दोलनको स्वरुपमा परिवर्तन

२०७३ मंसिर २१ गते मंगलबार, प्रकाशित

पाँच नम्बर प्रदेशको सीमांकन हेरफेरको विरोधमा प्रमुख प्रतिपक्षी नेकपा एमाले सहितका दलहरुले गराउँदै आएको रुपन्देही जिल्ला बन्द फिर्ता लिएका छन् । नेकपा एमाले, नेकपा माले, जनमोर्चा, जनमोर्चा नेपाल, नेकपा माक्र्सवादी र अखण्ड नेपाल पार्टीले सात दिनदेखि जिल्ला बन्द गराउँदै आएका थिए ।

लामो समयदेखिको बन्दले जनजीबन कष्टकर हुँदै आएको थियो । बन्दको सातौं दिन मंगलबार आन्दोलनरत दलका नेताहरुले संयुक्त विज्ञप्ति निकालेर बन्दको कार्यक्रम फिर्ता लिएको जानकारी दिएका हुन् ।

विज्ञप्तिमा आन्दोलनको स्वरुप परिवर्तन भएको उल्लेख छ र बन्द हड्ताल बाहेक विरोध जुलुश, सभा, बैठक लगायतका कार्यक्रम जारी राख्ने भनिएको छ । अहिले संविधान संशोधन विधेयकले संसदमा प्रवेश नपाएको र प्रवेश हुनासाथ पुनः सशक्त आन्दोलन सुरु गर्ने नेताहरुले चेतावनी दिएका छन् ।