मिस नेपाल श्रृंखला मिस वल्र्डको सेमिफाईनलमा

२०७५ मंसिर ७ गते शुक्रबार, प्रकाशित

चीनको सान्या सहरमा जारी मिस वल्र्ड–२०१८ को विभिन्न चरणका प्रतिस्पर्धामा नेपालको प्रतिनिधित्व गर्दै सहभागी भएकी मिस नेपाल–२०१८ शृंखला खतिवडा अघिल्लो चरणमा पुगेकी छन् । एक सय २१ देशका सुन्दरी सहभागी प्रतियोगितामा उत्कृष्ट ३० मा छनोट भएकी शृङ्खला सेमिफाइनलमा पुगेकी हुन् ।

टप मोडेल विधा अन्तर्गत उनी सेमिफाइनलमा पुगेकी हुन् । उनले बिहीबार साँझ फेसबुकमार्फत् आफू सेमिफाइनलमा पुगेको बताएकी हुन् । ‘सेमीमा प्रवेश गर्दा म अत्यन्त खुशी छु ।

प्रतिस्पर्धाको कठिन अवस्थालाई शानदार तरिकाले अवस्थालाई सम्हाल्न सकेकोमा प्रतिस्पर्धीले मलाई बधाई दिएका थिए’, उनले लेखेकी छन, ‘नेपालीले दिएको माया र विश्वासप्रति आभार प्रकट गर्दै सबैलाई धन्यवाद दिन चाहन्छु ।’

मिस वल्र्डमा भाग लिन शृंखला नौ दिनअघि चीन गएकी हुन् । २२ वर्षे शृंखला पेसाले इन्जिनियर हुन् । यसपटकको मिस वल्र्डको प्रतिस्पर्धामा शृंखला यसअघिदेखि नै अगाडि छन् ।

उनी एसियाबाट सबैभन्दा प्रभावशाली साबित भइसकेकी छन् । डिसेम्बर ८ मा चीनको सान्या सहरमा मिस वल्र्ड २०१८ को अन्तिम प्रतिस्पर्धा हुँदै छ । मिस वल्र्डको काउन्ट डाउन सुरु भइसकेको छ ।

मिस नेपाल श्रृंखला खतिवडालाई मिस वल्र्ड बनाउन दुनियाँभर छरिएर रहेका नेपालीहरुले मायाँ र स्नेहका साथ भोट गरिरहेका छन् । मिस वल्र्ड बन्नका लागी भोटिङको ठुलो हात रहन्छ ।

मिस वल्र्डसँग सम्बन्धित एउटा युट्युव च्यानलले तयार पारेको रिपोर्ट अनुसार मिस नेपाल श्रृंखला खतिवडा मिस वल्र्ड २०१८ को टप फाइभमा परेकी छिन् । यो मिस वल्र्ड आयोजकको आधिकारीक घोषणा त होईन तर एउटा युट्युव च्यानलले तयार पारेको मिस वल्र्ड २०१८ का प्रबल दाबेदार सुन्दरीहरुको सूचीमा नेपालकी श्रृंखला खतिवडा चौथो नम्बरमा परेकी हुन् ।

उनले भारत, चीन, फिलिपिन्स लगायतका सुन्दरीहरुलाई समेत पछि पारेकी छिन् । मिस नेपाल श्रृंखला खतिवडा यस सिजनको सबैभन्दा प्रबल दाबेदार प्रतियोगीका रुपमा रहेको गो पेजेन्ट नामक च्यानलको दावी छ ।

श्रृंखलाको अनुपम सौन्दर्य, उनको सामाजिक व्यवहार र विद्धताले उनलाई बलियो प्रतिस्पर्धी बनाएको उक्त रिपोर्टमा उल्लेख छ । साथै ब्यूटी वीथ पर्पोजमा श्रृंखला खतिवडाले देखाएको पर्फर्मेन्स सबैभन्दा उत्कृष्ट रहेको जनाएको छ ।

श्रृंखलाले ब्यूटी वीथ पर्पोजमा मकवानपुरको विकट क्षेत्रका चेपाङ वस्तीमा आफ्नो पहलमा स्वास्थ्य केन्द्र स्थापना गरेकी थिइन् । यस्तै गो पेजेन्टले नै तयार पारेको टप फिप्टिन लिष्टमा भने श्रृंखला खतिवडा पहिलो नम्बरमा रहेकी छिन् ।

श्रृंखला खतिवडालाई मिस वल्र्ड बनाउन कसरी गर्ने त भोट ? 

१. मोब्स्टार (Mobstar) नामक एप डाउनलोड गर्ने

२. कुनै पनि समाजिक सन्जाल एकाउन्टबाट लग इन गर्ने

३. अंग्रेजीमा Shrinkhala Khatiwada सर्च गर्ने

४.निलो थोप्लो भएको प्रोफाइल श्रृंखलालाई फलो गर्ने (आइओएसमा पहेलो थोप्लो)

५. प्रोफाइल भित्र गइ फोटो, भिडियोलाई देब्रेदेखि दाहिने तिर स्वाइप गर्ने (औलाले सार्ने)

६. कमेन्ट गर्ने । कमेन्ट पनि भोटमा गणना हुन्छ

७. जतिसक्दो सेयर गर्ने