चर्चा आशिरमान देशराजको लिप किस सिनको

२०७५ मंसिर १४ गते शुक्रबार, प्रकाशित

नायक आशिरमान देशराज जोशीले अहिलेसम्म २ वटा चलचित्रमा अभिनय गरे । त्यसमा पनि एउटा मात्र चलचित्र उनको रिलिज भएको छ । अर्को चलचित्र ‘ब्रेकअप’ रिलिज हुने क्रममा छ । तर, संयोग नै मान्नुपर्छ दुबै चलचित्रको गीतमा आशिरमानले नायिकासँग लिपलक गरेका छन् ।

पहिलो चलचित्र ‘ग्याङस्टार ब्लूज’मा आना शर्मासँग लिपलकको दृश्य दिएका आशिरमानले दोश्रो चलचित्र ‘ब्रेकअप’मा नायिका शिल्पा मास्केसँग लिपलकको दृश्य दिएका छन् । यसैले पनि उनलाई अब बलिउडका नायक इमरान हश्मी बन्न खोजेको आरोप लागेको छ ।

एक कार्यक्रममा उनलाई यही प्रश्न सोझियो । जसको जवाफमा उनले भने–‘मैले आफूलाई कोही अर्को हिरो बनाउनका लागि लिपलकको दृश्य दिएको होइन । दुबै चलचित्रमा त्यो कथाको माग थियो ।’

आशिरमानले २ वटा चलचित्रमा लिपलकको दृश्य दिदैमा यसो भनिहाल्न नमिल्ने बताएका थिए । आफूले यही दृश्य दिन्छु नै भनेर नदिएको पनि उनले बताए । आशिरमान पहिलो चलचित्रको असफलताले केही हच्किएका छन् । यसैले पनि उनका लागि यो दोश्रो चलचित्र चल्न आवश्यक छ ।