दैलेखको आठबीसमा बस दुर्घटना, ११ जनाको मृत्यु

२०७४ जेठ ३१ गते बुधबार, प्रकाशित

कर्णाली राजमार्ग अन्र्तगत पर्ने दैलेखको आठवीस नगरपालिका–४ को नैनलदेव मन्दिर नजिक बस दुर्घटना हुँदा ११ जनाको मृत्यु भएको छ भने १६ जना घाइते भएका छन् । कालिकाटको जितेकाँडाबाट महेन्द्रनगरका लागि छुटेको ना ४ ख २९९८ नम्बरको बस दुर्घटनामा परेको हो ।

दुर्घटनामा १० जनाको घटनास्थलमा नै र एक जनाको उपचारका लागि लैजाने क्रममा मृत्यु भएको छ । मृत्यु हुनेमा अछामका पञ्चदेवल नगरपालिका ९ का ३१ वर्षीय शिव नेपाली, उनकी छोरी १० वर्षीया रूपा, तुर्माखान गाउँपालिका ३ का २५ वर्षीय धिरेन्द्र बिसी रहेका छन ।

त्यस्तै कालिकोटको रास्कोट नगरपालिका ७ का ४० वर्षीय युवराज शाही, वडा नम्बर ५ का २५ वर्षीय धर्मराज शाही, २३ वर्षीय वर्षीय प्रकाश शाही, वडा नं. ६ की २१ वर्षीया कविता शाही र शान्ति त्रिवेणी गाउँपालिका ५ का २५ वर्षीय प्रकाश शाही रहेका छन् ।

तीन जनाको सनाखत हुन सकेको छैन । उनीहरू मध्ये दुई महिला र एक पुरूष रहेको दैलेखका प्रहरी निरीक्षक एकेन्द्र खड्काले जानकारी दिएका छन । दुर्घटनामा घाइते भएका १४ जनालाई एम्बुलेन्स र बसबाट नेपालगञ्ज पठाइएको छ ।

दुई जना भने सामान्य घाइते छन् । उनीहरूको दैलेखमै उपचार गरिएको छ । अशोक बोगटी भने सामान्य उपचारपछि डिस्चार्ज भएका छन् । बस सडकबाट करिब २/३ सय मिटर तल खसेको जिल्ला प्रहरी कार्यालयले जनाएको छ ।