हातखुट्टा गुमाएका कृष्णको सहयोगका लागी याचना

२०७५ पुष २४ गते मंगलबार, प्रकाशित

सेवाग्राहीलाई विद्युत जडान गरिदिन विद्युत पोलमा चढेका बेला मिलवाला साहुले विद्युत अन गरिदिँदा ११ हजार भोल्टेजको विजुलीको झट्काका कारण दुबै हात र एउटा खुट्टा गुमाएका रुकुमका कृष्ण वलीका लागी सहयोग उठ्ने क्रम सुरु भएको छ ।

देश विदेशमा रहेका नेपालीहरुले कृष्ण वलीलाई सहयोग गर्न सुरु गरेका छन् । बिभिन्न देशहरुमा सहयोग उठाउन थालेको खबरहरु आएका छन् । युकेबाट कृष्ण वलीको लागी ईलेक्ट्रिक हात पठाईदिने भन्ने समाचार सार्बजनिक भएको छ । त्यस्तै अमेरिका, मलेसिया र जापानमा पनि सहयोग संकलन गर्ने कार्य सुरु भएको बताइएको छ ।

नेपालमा पनि बिभिन्न सहयोगी नेपालीहरुले कृष्णलाई आर्थिक सहयोग गर्न सुरु गरेका छन् । मंगलबार पछिल्लो समय युट्युव र सामाजिक सञ्जालमा निकै भाइरल हुँदै आएकी लोक दोहोरी छेत्रकै होची गायिका मुना मगर र उनीसङ्गै भाइरल भएका लाहुरेले कृष्ण वलीलाई भेटेर केही आर्थिक सहयोग गरेका छन् ।

कृष्णको अवस्था देखेर उनिहरु दुबै निकै भावुक बनेका छन् । यस्तो पीडा देख्दा कस्को आँखा नरसाउला र ! उनिहरुले भनेका छन्–‘सारा नेपाली हजुरको साथमा छन् । कहिले पनि हार नमान्नुहोला । यति धेरै माया गर्ने तपाइको श्रीमतिको साहसले गर्दा सारा नेपालिको मन जितिरहनुभएको छ ।’

रुकुम पश्चिमको त्रिवेणी गाउँपालिका वडा नम्बर ९ का २१ वर्षीय कृष्ण ओली । मिजासिलो बोली, हँसिलो मुहार, खाइलाग्दो तन्नेरी जोवन, फूलजस्तै सुन्दर जीवन संगिनी । आमाले अर्कै रोजिन्, बाबाले घर छोडे । धेरै सपना साँचेका कृष्णले सानैमा ठूलै भारी बोके जिम्मेवारीका ।

ऋण सापट गरेर इलेक्ट्रिक सवइञ्जिनियर पढे । वर्ष दिनअघि काभ्रेकी रुपासँग लगनगाँठो कसे । जेठ २४ गते पहिलो वैवाहिक वर्षगाँठ मनाए । आफ्ना साथीभाई र परिवारका केही सदस्यलाई पनि बोलाए । त्यतिबेला जीवनसाथी रुपालाई कृष्णले काठमाडौं पठाएका थिए, स्टाफ नर्स पढाउन ।

आफूले कष्ट गरेर, हड्डी घोटेर पनि रुपालाई स्टाफ नर्स पढाउने धोको थियो कृष्णको । केही वर्ष त्रिवेणी गाउँपालिका–९, रुकुम पश्चिमको सिम्ली बजारमा दुवै जना मिलेर होटेल पनि चलाए ।

रुपाको स्टाफ नर्समा नाम निस्केको थियो, वैशाख पहिलो साताबाट आफूले तुलसीपुर दाङको विद्युत कार्यालयमा साइट सुपरभाइजरको काम पनि सुरु गरे । यति लोभलाग्दो दैनिकी र आशालाग्दो भविष्य सबैसामु देखाएका थिए उनीहरुले ।

भोलि के हुन्छ कसलाई पो थाहा छ र ? अघिल्लो दिन विवाहको वर्षगाँठ, भोलिपल्ट अर्थात २६ गते जागिरमा कामको पूर्ण जिम्मेवारी पाउने दिन थियो । तर, जेठ २५ उनीहरुको जिन्दगीको कालो दिन बन्यो, नियति अर्कै बनेर आयो । रुपा र कृष्णको जिन्दगीमा बज्रपात भयो ।

त्यो दिन, तुलसीपुर उपमहानगरपालिका वडा नं. १४ बखरिया भन्ने ठाउँमा ग्राहकहरुलाई विद्युतको लाइन प्रवाह गर्न कृष्ण पोलमा चढेका थिए । करिब–करिब तार जोड्ने काम सकिएको थियो । एक्कासि आएको ११ हजार भोल्टेजको करेन्टले उनी बेहोस हुँदै जमिनमा पछारिए ।

विद्युतको झड्काले पछारिएनन् मात्र, करेन्टले मृत्युको मुखमा लगेर छोड्यो । साँझको बेला, विद्युतको लाइन काटेर नै उनी पोलमा चढेका थिए । तर, अर्कैको गल्तीको सिकार भए कृष्ण । नजिकैको मिलवाला साहुले लाइन अन गरिदिएछन्, कृष्णलाई करेन्ट लाग्यो र जमिनमा बजारिए ।

साथमा सहयोगीहरु पनि थिए । तत्कालै एम्बुलेन्स बोलाएर कोहलपुर मेडिकल कलेज लगियो । उपचार सम्भव भएन, नेपालगञ्ज पुर्याइयो । त्यहाँ पनि उपचार हुन नसकेपछि भारतको लखनउ लगियो । त्यतिञ्जेल कृष्णको स्वास त फिर्ता भयो तर शरीर सग्लो नहुने देखियो ।

१८ दिनको लखनउमा ट्रमा सेन्टरको उपचारले कृष्णको अवस्थामा सुधार आएन । काठमाडौंबाट बेहोसीमै लखनउ पुगेकी उनकी जीवनसंगिनी रुपाले काठमाडौं ल्याइन् । कहिले ग्राण्डी त कहिले कीर्तिपुर अस्पतालमा लगिन् ।

लामो उपचारपछि निको त भए, तर उनका दुवै हात र एउटा खुट्टा काट्नुपर्ने भयो । रुपा जसोतसो सम्हालिने प्रयास गरिन्, कृष्णलाई अजम्बरी साथ दिनलाई गरेको वाँचा निभाउँदैछिन्, रुपाको साथले कृष्ण आफ्नो स्वास चलिरहेको बताउँछन् ।

कृष्ण भन्छन्–‘मलाइ मारिदिएको भए पनि हुन्थ्यो आखिर बाँचेर पनि केही गर्न सक्दिन । आँखाबाट झरेको आँसु पनि पुछ्न सक्दिन । म यतिमै खुसी छु कि, मलाई आफ्नो ज्यान भन्दा नि धेरै माया गर्ने श्रीमति (रुपा) पाएको छु । उनको यो साहस देखेर मेरो पनि बाँच्ने हिम्मत बढ्छ ।’

अहिले उनीहरु काठमाडौंको कुलेश्वरमा छन् । कृष्णको दुवै हात छैनन्, देब्रे खुट्टा छैन । देबे्र खुट्टालाई तीन पटकसम्म काटियो । रुपाले हारेकी छैैनन्, नेपाली दाजुभाइ दिदी बहिनी आफ्नै हुन् र अप्ठ्यारो पर्दा मद्धत गर्छन् भन्ने विश्वास बोकेकी छिन् ।

अहिलेसम्म उपचार गर्दा करिब ५० लाख सकियो । रुपा भन्छिन्–‘अब ५० लाख भए हात खुट्टा जोड्न मिल्ने थियो ।’ ग्रान्डी इन्टरनेशनल हस्पिटलका डाक्टरले हात खुट्टा जोड्न मिल्छ भने तर उनलाई थप ५० लाख जुटाउन मुश्किल छ । रुपाले जग्गा बेचेर, ऋण काढेर अहिलेसम्मको खर्च जोहो गरिन् ।

रुपाका अनुसार अझै ५० लाख तिर्न बाँकी छ । कृष्णका दाइ सुशीलले घरको जायजेथा बेचेर भाइको हालसम्मको खर्च जुटाउन सक्रिय रहे । अब परिवारले सम्पूर्ण नेपाली मनहरुलाई हात फैलाएर सहयोगको याचना गरेको छ ।

सबैको सहयोग पाए कृष्णको शरीरमा इलेक्ट्रोनिक हातखुट्टा जोड्न सम्भव छ । उनलाई हात र खुट्टा जोड्न सबैले सहयोग गर्न जरुरी छ । भगवान भनेको मानवीय मनहरु नै हो ।

सानैमा बुवाआमाको मायाबाट अलग रहेका, सुन्दर जीवन र सपनाका चाङ बोकेका २१ वर्षीय कृष्णको जोवन अहिले बेडमा सुस्ताएको छ । देश विदेशमा हुने मनकारी दाजुभाइ दिदीबहिनीहरुलाई कृष्णको हातखुट्टा जोड्नको लागि जतिसक्दो आर्थिक सहयोग गरि दिन परिवारजनले आग्रह गरेका छन् ।

कृष्ण ओलीकै नाममा सनराइज बैंक काठमाडौं, कालिमाटी शाखामा रहेको खाता नम्बर ०७७०५०३१६५२०५००१ र मोबाइल नम्बर ९८०३७४५७०८ मा सम्पर्क गर्न सकिने परिवारले बताएका छन् । तपाईँ हाम्रो सानो सहयोग कृष्णको लागि भगवानको रुप हुन सक्छ । कृपया जति सक्नुहुन्छ सहयोग गरिदिनुहोला । हाम्रो पनि आग्रह छ ।